Z Janšojc/Jänschwalde. Južo w prědnem tyźenju apryla jo Rosemarie Tšukowa – abo jano Rosi, ako Janšowarje ju lubosnje pomjenjuju – měła swój zakup. Wót prědnego apryla jo wóna nowa wjednica Serbsko-nimskego domowniskego muzeja Janšojce.

Jeje prědownica Nadine Adamowa jo za nowymi wupominanjami pytała a jo łoni swójo statkowanje w janšojskem muzeju skóńcyła. Wót januara do měrca su k wětšemu źěloju cesnoamtske sobuźěłaśerje wótwórjeńske casy zawěsćili. Teke Nadine Adamowa jo jich we tom casu pódpěrała a wóstanjo muzejoju we wutšobje zwěrna.