Wšykno hynakše, wšykno to same
Cuzy kraj, cuze luźe, cuza kultura – žywjenje we wukraju njejo pśecej jano idyliske. Weto som za to poł lěta na kupje Gran Canaria pśi studiumje z programom Erasmus w głownem měsće Las Palmas wjele wót sebje a drugich europskich studentow nawuknuła. To nejwažnjejše pśi tom jo, až smy, snaź na prědne póglědnjenje hynakše, na druge pak smy a wóstanjomy wšykne luźe, cłowjeske paršony, njewótwisnje wót kultury.
To tak gronim, dokulaž som bydliła z pólskeju, italskeju a nimskeju studentku a ze špańskim pśijaśelom. To njejo k wopśimjeśu, ale ja som se rozměła ze wšyknymi, jano z teju nimskeju nic. Togodla som nazgóniła, až naša kultura jo jadna wěc, naš charakter pak druga. Stereotypy a pśedsuźenja we realnem žywjenju se malsnje wótpóraju a pógromadne žywjenje wšakich kulturow jo absolutnje móžne.