Chto ga njeznajo ten znaty a pśecej hyšći lubowany šlager wót Paula Kuhna „Na Hawaii njejo žedno piwo“? Wolfgang Lotra (Lottra) z Hochoze jězdźi 30 lět pó mórjach a jo woglědał pśisamem do wšyknych wustawadłow togo swěta, a wón dejał zapšawym móc groniś, lěc to jo wěrno, což we titelu togo šlagera stoj. Ale razka wón njamóžo to wobwěsćiś. Pśeto rowno na Hawaii njejo hyšći žednje póbył za cas swójeje 30lětneje słužby ako łoźownik (Seemann, Schiffsmann). Na com to lažy, jo hochoski Lotti (tak gronje jomu jogo pśijaśele) Casnikoju rad a ekskluziwnje wulicył.

Nowy Casnik: Kněz Lotra, wy jězdźiśo kradu tśiźasća lět z łoźu pó dalokich mórjach a oceanach a pśewóźujośo urloparje do wšyknych nugłow togo swěta. Dla cogo feluju rowno kupy Hawaii na Pacifiskem oceanje we zapisu Wašych celow?