Jadnaŕ Domowiny Bjarnat Cyž źo na wuměńk. Domowina jo musała kradu pytaś, nježli jo někogo namakała, kótaryž se góźi za ten amt. Na kóńcu jo se Marko Kowar za to pśizjawił. 17. septembra jo Zwězkowe pśedsedarstwo Domowiny jogo ako jadnarja wót 1. januara pówołało. Kowar jo dłujkolětny referent Domowiny, tuchylu za góspodarstwo a infrastrukturu. 2011 do 2014 jo był jadnaŕ za Serbski ludowy ansambel. Ten 57 lětny kulturny wědomnostnik, sorabist a etnograf jo teke organizator mjazynarodnego folklornego festiwala „Łužyca“, Pśidatnje ma kněz Kowar wjeliku familiju a wjele cesnoamtskich zagronitosćow. Nowy Casnik jo kśěł wěcej wót njogo zgóniś. Rozgranjała jo se z nim Ines Neumannojc.

Nowy Casnik: Wy ga buźośo wót 1. januara 2017 nowy jadnaŕ Domowiny. K tomu wutšobnje gratulěrujom.

Marko Kowar: Wutšobny źěk (jo w dolnoserbskej rěcy gronił).

Referent Domowiny sćo wót lěta 1996. Kak jo tomu dojšło?