Chóśebuz/Cottbus. Źaseśo młode luźe su zachadny stwórtk wordowali pócesćone wót Rěcnego centruma Witaj (RCW) za swój angažement abo dobre wugbanja pśi wuknjenju a nałožowanju serbskeje rěcy. RCW jo za nje organizěrował pśejěźenje z cołnom pó rěce wót žandojskego mósta k Wjelikej pušćalnicy (das Große Spreewehr). We tamskej kjarcmje jo kuždy wót nich z rukowu wjednika RCW dr. Viktora Zakara dostał słownick, CDeju z filmom a gódańske graśe Pšašaj se mě raz & ja som .... no, co ga? Do rozgrona z nimi su pśišli mjazy drugim Domowinska koordinatorka za młoźinu, zastupniki RCW, Załožby za serbski lud, serbskeje redakcije rbb a A.B.C.eja.