Chóśebuz/Cottbus. Rěcny centrum Witaj organizěrujo w oktoberu nowy tśidnjowny kurs serbskeje rěcy za wótkubłarki ze źiśownjow a hortow. 32 jo se jich nagromadu pśizjawiło. Wóni su mjazy drugim z města, z Wětošowa, z Hochoze, z Raduša, Bórkow, Janšojc a teke z Mósta, což jo wósebnego wobspomnjeśa gódne, pśeto tam žeden Witaj-projekt dotychměst njamaju. Wóni budu tam wuknuś leksiku, kótaraž jo za źěło w źiśownjach a hortach notna, a teke konwersaciju w serbskej rěcy wjasć a na serbske pisaś. To jo nam wulicował wjednik Rěcnego centruma w Chóśebuzu dr. Viktor Zakar.

Iniciatiwa k takemu kursu jo wujšła wót wótkubłarkow samych. To póžedanje za kursom su wóni zjawili sobuźěłaśerce RCW Gunźe Heyderowej, kótaraž se z nimi regularnje zmakujo a jim pomoga we rěcnych pšašanjach.