Lětosa maju wšake swěśiś na bórkojskej Droze serbskego krala. Tam lažy dwór, kótaremuž stare gronje „Kašula“. How stej žywej Dziumblic Christa a Dieter. Wónej wušywatej serbske drastwine źěle, Dieter Dziumbla pśěźo wałmu a wugótujo samo drebomy za gódy. Zachopili stej ze swójim pśedewześim pśed 25 lětami. Ale to njejo jadnučki jubilej lěta 2016. W juliju stej manźelskej swěśiłej złotu swajźbu – a njeźelu, 11. septembra jo Christa D. měła swój 70. narodny źeń. Dobra góźba za nas, raz na woglěd jěś do Bórkow.

Jo wukubłana šlodarka

Christa Dziumblina jo roźona bórkojska. Familija jo była serbska, mama jo chójźiła burska až do 1970ych lět. Serbsku rěc njejsu jej dalejdawali. Wina na tom jo, až starjejšej stej měłej w šuli wjele wobuze togo serbskego dla. Na serbsku wucbu su tu mału pak pósłali.