Na ludowych spiwach laže cesto klišeje. Za młogich su to jano kitšojte šunklowańske spiwy. „Toś ten pśedsudk pak njepśitrjefijo. Rowno nawopaki. Ludowe spiwy su bejnje direktne, wopšawdne a za wětšy źěl ze žywjenja wzete. Jich wjeleserakosć jo wjelicna. Dajo tužne balady rowno tak ako jěderno-wjasołe spiwy. Z togo fundusa my póceramy“ groni Fabian Kaulfürst, sobuzałožaŕ serbskeje spiwneje kupki „Přezpólni“ (Te ako pó pólu pśidu). Kupka swěśi něnt swójo źaseślětne wobstaśe. Wó nastaśu, motiwach a wopśimjeśach jo z nim powědał Andreas Kirschke.

Kněz Kaulfürst, ga a kak su nastali „Přezpólni“?

Fabian Kaulfürst: Zachopjeńki laže w nazymje 2005. Něgajšne rejowarje Serbskego folklornego ansambla Wudwor su se zmakali. „Dla cogo njedejali załožyś muskecu spiwnu kupku?“ su se pśi tom pšašali. Su na mnjo zawołali, a ja som pód jadnym wuměnjenim pśigronił: mě jo wažne było, až spiwamy ludowe spiwy w swójej spócetnej wašni a jadnogłosnje. To jo nejžpjerwjej raz wubuźiło cwiblowanja. Tola pó někotarych probach a prědnem wustupje 2006 su byli wšykne pśeznanjone.

Za co stoj mě „Přezpólni“?