Chóśebuz/Cottbus. Šulski amt jo swóje pśedstajenja pśesajźił, až dej na Dolnoserbskem gymnaziumje (DSG) južo wót šulskego lěta 2016/2017 bilingualna wucba we dwěma pśedmjatoma byś.

Zagronity šulski raźc Ulrich Hirthe jo Casnikoju gronił, až jo šulu hyšći do proznin wót togo informěrował, až jo plan šule za bilingualnu wucbu 2016/2017 pśizwólił. Ale někotare dypki deje se hyšći zaźěłaś. Na pśikład deje te rěcnje dobre wukniki južo ned měś bilingualnu wucbu w pśedmjatoma muzika a stawizny, jo Hirthe pódšmarnuł. A ta wucba njedej byś jano w modulach bilingualna, ale zasadnje dej byś serbska rěc ta rěc we wucbje.

Prědny lětnik, kótaryž dej měś wucbu pó tym systemje, jo něntejšna 7. rědownja a te wukniki w 5. lětniku.

Hirthe jo gronił, až dostanjo DSG nejskerjej status specialneje šule. Pón buźo šulski doglěd ze ceptarjami powědaś a pominaś, až serbski powědaju. Gaž njebudu, muse hyś na drugu šulu, jo gronił Casnikoju. Partnarje ako Šula za dolnoserbsku rěc a kulturu a uniwersita Lipsk deje jim dalejkubłanja póbitowaś, jo gronił.