Slěpjańska gmejna co skerjej a lěpjej pśiś do rozgrona z českim koncernom EPH, tym nowym wobsednikarjom brunicoweje sparty Vattenfalla. To jo wuzwignuł šołta Reinhard Bork gano na wobradowanju gmejnskeje rady. Žedne pisma we tej nastupnosći su se jim južo pósłali, doněnta pak njejsu žedno wótegrono dostali.

Gmejna co wěźeś: Buźo-li EPH daś jim tu pódpěru, wó kótaruž su se pjerwjej z Vattenfallom wujadnali? Pjerwjej jo Vattenfall jim lubił, až buźo to wujadnanje koncernoju EPH gromaźe z cełeju brunicoweju spartu sobu pśedaś we jadnom paketu. Ale kak buźo EPH z nim wobchadaś? A pśiźo-li dalšnym pśesedlenjam, ga kak budu z pśesedlonymi wobchadaś? „Za našym zdaśim njesmějo se jim górjej zejś ako tym, ak su se pśesedlili dla Wochožańskeje jamy I. Wóni njesměju byś pśesedlarje drugeje klase“, jo Bork gronił. Gmejna jo tegdy wjele proce, wjele mócy a casa nałožyła, aby se z Vattenfallom zjadnali. „To pilnowanje njedejało pódermo byś“.

Nimsko-serbski šulski centrum dej skóro pśiś