Jo to było w lěśe 2009. Kradu 28. awguta togo lěta jo se w małej jsy Kóšnojce/Koschendorf, ako słuša k městoju Drjowk, něco wjelgin wažnego tšojło. Załožyli su tam zapisane Domowniske towaristwo, kótaremuž pśisłušajo něnto wokoło 25 cłonkow, wót 40 do něźi 70 lět stare.

Pśedsedarstwo ze 7 cłonkami nawjedujo wót wšogo zachopjeńka Roswita Altekrügerowa, žeńska landrota, kenž ma swój dom w tej wjasce blisko Lutola, wósrjejź góle. „W našej jsy jo se južo pśecej wjele stało, a togodla smy se byli wobjadne, až musy se załožyś jadno towaristwo, ako wšykno nawjedujo a organizěrujo. To pak njedej staś jano na papjerje, ale musy žywe byś a se gibaś“, se pśedsedarka domyslijo na ten cas pśed 7 lětami. Głownje jo se kśěło nowe towaristwo staraś za zdźaržanje a woplěwanje wšych wejsnych tradicijow a wšogo togo, což ma cyniś z domownju, za spěchowanje kultury a wuměłstwa a za pódpěru młoźiny a staršych luźi. A pó tom wóno teke źěła!