Rowne/Rohne. Brunicowy koncern LEAG pódpěrujo nadalej Serby, jo dobra powěsć wót 2. decembra. Na tom dnju su se zmakali na Njepilic dwórje w Rownem zastupniki LEAG pód nawjedowanim pśedsedarja za górnistwo Uwe Grosserom ze zastupnikami Serbow. Wót boka Domowiny su byli pśipódla jadnaŕ Bjarnat Cyž, zastupny jadnaŕ Markus Końcaŕ, Manfred Hermaš a referent Marko Kowar.

Grosser jo sebje žycył nadalej dobre zgromadne źěło z Domowinu, teke gaž koncern ma něnto nowe mě. Grosser jo pódšmarnuł, až kśě teke něnto zagronitosć za region pśewześ a teke serbski lud nadalej pódpěrowaś.

Domowina a LEAG stej ako pśecej wudałej zgromadne medijowe powěźenje. Tam su wózjawjone zasadne stojnišća wobeju bokowu, Dalšne dypki pak su pótajmne, wósebnje suma spěchowanja. Za wšym zdaśim jo wóna mjeńša ako w slědnych lětach, ale wětšy źěl projektow mógu weto pśewjasć. Tak signalizěrujotej dolnołužyska a slěpjańska župa.