W casu pó 1989 jo se w młogich gremijach – na pśikład pśi wšakich kulowatych blidach – wó tom mócnje diskutěrowało, kak buźo abo kak by mógało byś w nowem politiskem casu to cełe góspodarstwo w Dolnej Łužycy. Za wětšy źěl běchu se tegdy pśed wušej 25 lětami wobjadne we tom, až ma kšac pó kšacu slědk hyś z wuglowymi jamami. To jo se teke stało, wót něźi 15 wuglowych jamow w tegdejšnem wobwoźe Chóśebuz jo jano 5 wušej wóstało. Žedne elektrarnje (milinarnje) su se wót-ryli – te we Wětošowje, Lubnjowje, w Dubrawje, w Carnej Plumpje – a druge su modernizowali, ako tu janšojsku. W Carnej Plumpje su natwarili wjelgin modernu nowu. Gaž jo na kóńcu DDR źěłało w Łužycy něźi 80.000 luźi we wuglowych jamach a milinarnjach, jo jich to mjaztym jano hyšći wokoło 8.000. To zlubjenje 1989, až njebudu wěcej žedne łužyske a serbske jsy wótbagrowaś za wuglowe jamy, pak njejsu bóžko dopołnili. Klětno/Klitten, Kóšnojce/Koschendorf a dalšne jsy drje su wumóžyli pśed smjerśu, ale Rogow/Horno su wótbagrowali.