Ako smy njedawno spominali na 100. narodny źeń dr. habil. Frida Mětška, njeběšo dosć casa, aby pśedstajili, z kim wšykno jo měł intensiwne zwiski stawizniskeje a narodneje wěrnosći dla, ga běšo jich w tu- a wukraju bejnje wjele. Mjazy nimi radna licba dolnoserbskich luźi, lěc burska, ceptarska abo fararska inteligenca. Wón rozmějašo jich ako spušćobne znanki casowych a serbskich tšojenjow, wóni běchu za njog žywa wopšawdnosć a žrědło za wědomnostne źěło.

Jaden z nich běšo Fryco Grěšeńc/Friedrich Greschenz (1891-1965), znaty drje z měnjatym žywjenim a jadnanim, ale nic jano za Fr. Mětška wěrny informator.

Z nadawkom do Wětošowa

Zachopjeńk 1958 dostach wót Mětška nadawk se wuderiś do Wětošowa a nazběraś pla Fr. Grěšeńca za njogo daty a informacije. Mimo swójich pšašanjow tłocašo mě a do ruki pśirucny list: Luby tow. Grěšeńc! Młody wucabnik Pětr Janaš pśiźo w mojim nadawku z někotarymi historiskimi pšašanjami k Tebje. Ja by Tebje pšosył, aby jomu kśěł trjebne informacije daś. Wjele dobrego a postrow Twoj Mětšk, 27.1.58