Chóśebuz/Cottbus. We rědu zasłužonych wuconych serbskich luźi namakajomy teke takich, kótarež su chwalobne statki wugbali, ale jich mě se źinsa jano rědko spomina. K takim njedowucesćonym paršonam słuša faraŕ a rěcywědnik Christian Wilhelm (Kito Wylem) Broniš (1788–1881). Sorabistiske slěźenje jo jogo wugbanje na pólu serbskeje rěcywědy (Sprachwissenschaft) na boce wóstajiło – jo groniła dr. Anja Pohončowa ze Serbskego instituta w Budyšynje we swójom referatu, źaržanem w zachadnem mjasecu we wjažy Šule za dolnoserbsku rěc a kulturu. Christian Broniš jo pśed 135 lětami wumrěł.