Chóśebuz/Cottbus. Jurij Koch jo jeju wuchwalił: taki dobry niwow serbskeje rěcy njejo pla wuknikow wótcakał, jo gronił. Ten mjaztym 80lětny serbski spisowaśel jo gronił, až jo ekstra dla togo na Serbske blido pśišeł, dokulaž jo kśěł wěźeś, kak derje wukniki Dolnoserbskego gymnaziuma (DSG) serbski wuměju.

Teke druge luźe su w dobrej licbje pśichwatali do Měsćańskego muzeja, a to, rownož sněgowy štorm jo z togo jězdźenja pšawe dyrdomdejstwo wucynił. Tema „Serbska rěc – coolna wěc?“ jo pśiwabił dogromadu 22 luźi na Serbske blido. Pśišli su priwatne zajmce tak ako wót institucijow.

A teke fany a pódpěrarje młodostnych lubowarjow serbskeje rěcy su pśichwatali, mjazy drugimi dešańska fararka Katharina Köhlerowa aktiwna rěcna partnarka Eliasa Bissego (15) ze Žylowa, cłonka młodeje wósady a wuknika DSG. Gaž sebje mailku pišotej, pón serbski. A na tyźeńskich zmakanjach młodeje wósady padnjo teke jadna abo druga serbska sada.