Janšojce/Jänschwalde. Tuderska Domowinska kupka jo kazała sobotu tyźeń wobydlarjam do Lapšojc kjarcmy w Pipanojcach („zur Linde“) na wósebne zespominanje starego lěta. Togodla njejo źiwne, až zal jo był malsnje połny. Nic jano dla togo spominanja, ale teke dla tog, až na tom dnju dejało se znate cyniś, co buźo dalej z konsumom „Rieses Dorfmarkt“, teju jadneju wejsneju lodu we cełem Picańskem amśe.

Južo zaprědka jo było wšyknym wědobne: Janšojska gmejna glěda slědk na ekstremne lěto. Ekstremne we dobrem zmysle: wóno jo było wjelgickano bogate na wjasołych a wjelikich tšojenjach. Což Janšojske na kuždy part derje mógu: swěśiś, swěźenje organizěrowaś a wjasołe byś. Aby se togo hyšći raz dopomnjeli, su wobydlarje zezběrali wšykne swóje fotografije. A te su wordowali na kulturnej woklapnicy zjawnje pokazane. Pśi tom su wšake paršony źaržali grono, kaž pśedsedarka Domowiny Rosi Tšukowa a cłonk gmejnskeje rady Hein Dabo. Wónej stej ten wjacor chytśe moderěrowałej.