Dogromady pśisamem 400 kilomejtari dłujka jo naša luba Sprjewja abo naša Rěka, ako serbske luźe jej gronje. Jeje zachopjeńk jo na górje Kottmar a w měsće Neugersdorf w Górnej Łužycy. Wóna běžy za Barlinjom do Habole/Havel.

Wšake wětše a mjeńše města laže pśi Sprjewi. We Łužycy su to Budyšyn, Grodk, Chóśebuz, Lubnjow a Lubin. Za nje njejo wóna rowno tak ako za wše jsy a wjaski, kenž su se natwarili pśi brjoze Sprjewje, jano rědna pśiroda a wokolina, ale wóna jo rowno tak wjelgin wažna a wužytna za góspodarstwo, za rybarstwo, za historiju a za turizm, gaž se myslimy na Błota. Teke ze žywjenim a historiju Serbow w Górnej a Dolnej Łužycy jo wusko zwězana. We młogich spiwach, štuckach a drugich literarnych pismach jo naša „Maśerka Sprjewja“ wobspiwana a wopisana.