Picnjo/Peitz. Bramborske ministarstwo za kubłanje, młoźinu a sport pśigótujo nowe póstajenje za serbsku wucbu (Sorben-/Wenden-Schulverordnung), do kótaregož kśě zapisaś minimalnu licbu wu­knikow we serbskej a bilingualnej wucbje: 12. We slědnem Casniku smy južo pisali: Budu-li se te plany wuwjasć, ga grozy tšach, až serbska wucba na wjelich městach wopśestanjo.

Pśeśiwo tomu jo se chopił protest gnuś. Na iniciatiwu Ka­thleen Komolcyneje z Gołkojc–Pódgole, mamy tśich źowkow, ako su na Witaj-projekśe wobźělone, su starjejše Witaj-źiśi ze Žylowa wobzamknuli, až budu se pónjeźele zmakaś, aby gromaźe pśigótowali transparenty za demonstraciju. Ta sama jo se dejała pśewjasć na drugi źeń, wałtoru, pśi góźbje wósebnego wobradowanja Serbskeje rady w Mozaikowej šuli w Picnju. [dla tog, až redakciski kóńc jo wu nas pónjeźele, njamóžomy hyšći pisaś, kak jo se ta akcija raźiła – to buźośo zgóniś za tyźeń]. Napominanje, aby luźe se na njej wobźělili, jo se rozšyriło w interneśe.