Lipje/Leipe. Pětk tyźeń jo tudy zamrěł Günter Buchan, něgajšny góspodaŕ a wobsednikaŕ Lipjańskego gósćeńca, zapalony rybakaŕ, wjelim znaty pśez to, až jo na swěźenjach a we kursach rěcneje šule zjawnje pokazował, kak se rybacne seśi pletu.

Günter Buchan jo se naroźił 1943 Wón, ten nejmłodšy stryrjoch Buchanojc synow, jo z cołnom a na cołnje górjej rosł . Až do 1969 ga njejo žedna droga na Lipje wjadła. Wón jo wót małkego tunki pśeglědował a seśi stajał. Zaprědka jo glědał nanoju pśez ramje, pótom jo chopił sam.

Günter Buchan jo se dał wuwucyś ako rolnikaŕ. „Na rolu a pastwu smy pśišli jano z cołnom. Gnoj a futer smy z cołnom wózyli, pó cołnje su krowy pśišli na pastwu a teke z pastwy k flejšarjeju. Ten cołn jo był młogi raz połny nalodowany, 25 centnari śěžko“, jo wón raz wulicował wót pjerwjejšnego casa.

Rownož rolnikarstwo na Lipjem jo było ceło wósebne, su musali weto załožyś LPGeju. „Mój nan jo był pśedsedaŕ a ja pśistajony bur. My smy to z humorom brali, ja ga som skóro chopił źěłaś na montažy pla Nimskeje zeleznice. Som pótom tyźeń źěłał we cuzbje, tyźeń doma“.