Lube źiśi,

Serby raźi swěśe – teke serbske źiśi. To jo se gano pokazało w źiśowni „Tyca“ w Hochozy. Wóttam su nam pśipósłali rědnu powěsć. Cytajśo sami!

*

To nowe lěto jo se wu nas rědnje zachopiło. Na 15. januarje jo naša serbska kupka kazała wšyknym źiśam z našeje źiśownje na ptaškowu swajźbu. Marwin Schäfer jo był za póbratša, wón jo togo nawóženja Benny Schirrgotta a tu njewjestu Valentinu Mjelišojc (Mehlisch) na swajźbu pśiwjadł. Wšykne źiśi su gromaźe spiwali, pótom su rědnje gósćinowali a jědli dobre wěcy. Pótom su źiśi w pisanych kostimach śěgnuli pśez wjas. Ako su pśišli do źiśownje slědk, su namakali pód našeju wjelikeju budku za ptaški małke dary. Chto jo je tam nascynjał? To su byli zawěsće ptaški, ako su se na tu wizu źiśam za zymske futrowanje wuźěkowali. To jo był rědny swěźeń!

Za cas zymskich prozninow smy swěśili dalej. Źiśi ze źiśownje a z horta su ganjali pó cełej jsy w rědnych, pisanych kostimach a ze wšakimi instrumentami. Wóni su camprowali! Hochoske luźe su z wjaselim južo na nje cakali. Wóni su nadostawali wjele jajow, słodkego a pjenjez.