Něnt jo se zachopił we Łužycy ten cas jatšownych wustajeńcow a wikow. Take budu mjazy drugim južo něnto na kóńcu tyźenja w Serbskej tkajarskej śpě w Drjowku (26. měrca) a w Serbskem kulturnem centrumje w Slěpem (1. a 2. apryla).

W Chóśebuzu pak móžomy se južo wót 15. měrca taku wósebnu wustajeńcu k jatšam woglědaś, a za to jo samo až do 7. maja cas a góźba. Jej se groni „Osterfreuden – Pó jaja“, a wóna jo na wšaki part tšochu hynakša ako te w slědnych lětach. Gaž te su se wugótowali pśecej w Serbskem muzeju na Młyńskej droze, pón njejo to lětosa móžno. Ten ga jo južo cełe lěto zacynjony, dokulaž se docełego pśetwarjujo a modernizěrujo. Togodla su lětosnu jatšownu wustajeńcu wugótowali w domje Měsćańskego muzeja na Dwórnišćowej droze, źož ga běchu južo łoni w nazymje wótwórili mjeńšu serbsku wustajeńcu „Zachowane drogostki“.