Poměr mjazy wěrjecymi a statom w NDR njeběšo jadnory, to njejo pótajmstwo. Kśesćijany su se pak móžnosći wuwójowali, aby prezentne byli. Nic jano za murjami cerkwje, ale tek w zjawnosći. Na pśikład su se wudali kśesćijańske casniki. Serby w Górnej Łužycy su južo wjelgin jěsno dostali Serbsku kazń wót tegdy hyšći wobstojeceje Sakskeje. A wóni mějachu swójo nakładnistwo a swójo casnikarstwo.

K tomu serbskemu casnikarstwu stej se pśitowarišyłej južo wót zachopjeńka pěśźasetych lět nabóžnej casopisa: Katolski posoł a Pomhaj Bóh. Katolski posoł jo měł wěcej abonentow nježli źenik Nowa doba a jo měł wjeliki wliw na swójo cytarstwo. Pomhaj Bóh som sam někotare lěta redigěrował. Se wě jo była censura, ale censor jo był sam wěrjecy katolik a jo mě skerjej raźił ako něco zakazał.