Bórkowy/Burg. Na zakładnej a wušej šuli „Mina Witkojc“ jo tradicija, až k nowemu lětoju a w januarje baslimy Nowolětka. Lětosa smy w 2. a 3. rědowni tema „Ptaškowa swajźba“ wobjadnali. W februarje smy se woglědali ze wšyknymi Serbšćinarjami Ptaškowu swajźbu Serbskego ludowego ansambla w chóśebuskej měsćańskej hali.

Jatšowne nałogi su kužde lěto tema w serbskej wucbje. Źiśi 1. do 3. lětnika su směli na šulskem dwórje walkowaś. 5. a 6. lětniki su jaja wóskowali. Starše wukniki su jaja pó technice škrabanja wupyšnuli. Pó ferijach zaběraju se źiśi 4. lětnika hyšći raz z jatšownymi nałogami.

W ramiku projektowego tyźenja w aprylu su wugótowali wukniki Serbšćiny 5. a 6. lětniku w projekśe „Tekstilne wugótowanje serbskich mytyskich bytnosćow“ małe narucne pupki. K tomu smy mógali dobyś wuměłcowku Regina Hermannowu. Ten projekt su pódpěrowali Domowina, Domowinska kupka z Kuparskich Bórkow a spěchowańske towaristwo zakładneje a wušeje šule „Mina Witkojc“ z Bórkow.