Wót serbskich institucijow se wótergi špatnje powěda: až tam źěłaju „pówołańske Serby“, až njejsu „wendiske“, až njejsu se wót komunistiskich strukturow wótwobrośili a tak dalej. Pśi tom jo kopica našych tuchylnych institucijow akle pó 1990 nastała. Załožba za serbski lud jo swěśiła pśed poł lětom swój 25. jubilej. Wóna jo zakład za źěło dalšnych institucijow. Pótakem swěśi lětosa kopica drugich serbskich institucijow swój 25. jubilej: 6. měrca Lodka, 8. maja ABC a 9. septembra DSG. 26. oktobra swěśi Serbski institut z institutnym dnjom w Chóśebuzu běrtylhundertsty jubilej swójogo załoženja.

Nowo nastała jo we tom wichorojtem casu pśed 25 lětami teke dolnoserbska telewizija – a to ako kradu nowa wěc. Telewizny program w našej rěcy doněnta docełego njejo dało! Teke nic w górnoserbskej rěcy. Tam jo serbska telewizija akle pózdźej nastała.