Dešno/Dissen. Až na sportnišću w Dešnje młode balokoparje graju a treněruju, to njejo nic wósebnego. Což pak jo se tam stało slědny tyźeń srjodu, 17. maja wjacor, to jo było něco kradu nowego. Z młogich serbsko-nimskich jsow we wokrejsu Sprjewja-Nysa ga su balokoparje howko pśichwatali na prědny zgromadny trening. Wušej góźiny dłujko su how za balom „lětali“. Nejpjerwjej jo Maurice Ehmke, chóśebuski fitnes-trainer, z tymi pśisamem 20 balokoparjami wšake zgromadne zwucowanja pśewjadł, a pón jo trainer Horst Krawcyk ze Žylowa, wukubłany ceptaŕ ze balokopanje (Fußballlehrer), jim dał cas za graśe we dwěma mustwoma. A to wšykno su napšawdu z wjelikim wjaselim a z „połneju mócu“ cynili. „Som ned wiźeł, až su to za wětšy źěl dobre balokoparje, ako ga hyšći aktiwnje graju we wšakich mustwach we wokrejsnej wušej lize, w wokrejsnej lize a wokrejsnej klasy. Myslim se, až móžo z togo nastaś napšawdu dobre a mócne mustwo“, jo se wjaselił Horst Krawcyk.