Baršć/Forst. Rownož licba wobydlari we wokrejsu Sprjewja-Nysa póněcom wóteběra, ga weto njejsu tuchylu žedne šule we swójej eksistency wobgrozone – daniž zakładne šule, daniž wuše šule, daniž gymnaziumy. Licba wuknikow wóstanjo stabilna, nanejmjenjej do lěta 2028, do kótaregož to něntejšne planowanje dosega. Stakim njewobstoj žeden tšach, až někaka šula ze serbskeju wucbu se zamknjo. To su zgónili cłonki serbskego wuběrka (Ausschuss) na wobradowanju srjodu tyźeń we wjažy Tekstilnego muzeja w Baršću. Wjednica wótźělenja za kulturu a šulstwo we wokrejsnem zastojnstwje Eva Szramekowa jo jim nadrobnje pśedstajiła plan za wuwiśe šulstwa we wokrejsu.