Za tym, ak na głownej a wólbnej zgromaźinje Zwězka serbskich wuměłcow łoni w nowemberu njejsu wuzwólili nowe pśedsedarstwo brachujucych kandidatow dla, jo se wólbna zgromaźina znowotki wótměła 28. apryla w Budyšynje. Tenraz z wuspěchom. Ako nowy pśedsedaŕ ZSW jo wordował wuzwólony Jan Bělk. Z nim jo se rozgranjał Alfons Wićaz.

Co jo Was pógnuło za toś tu cesnoamtsku funkciju kandiděrowaś?

Jan Bělk: Som južo lětźasetki dłujko cłonk ZSW, teke ako jo se zwězk pó pśewrośe wótnowotki załožył. W NDRskem casu njejo bylo lažko se do togo zwězka dostaś. Togodla jo to za mnjo někak logiski, až se pó mójich mócach how intensiwnje angažěruju. To mě gótujo wjelike wjasele. Myslim, až z mójimi nazgónjenjami, kótarež som se ako cłonk Zwězkowego pśedsedarstwa Domowiny a w jogo kulturnem wuběrku nazběrał – mógu k tomu pśipomogaś źěło ZSW wótžywiś a pózbuźiś.

Wy sćo se zawěsće wjaselili, až sćo na wólbnej zgromaźinje dostali wšykne głose pśibytnych.