Lube źiśi,

kuždy wót Was raz grajkoco – nic ga? A to jo teke Wašo pšawo. Tak pišo UNO (Zjadnośone narody) we swójich konwencijach wó pšawach źiśi.

Aby na to spominali, zarědujo Nimska organizacija za pomoc źiśam (NOPŹ, Deutsches Kinderhilfswerk) kuždy lěto „Źeń graśa“. To jo njeźelu, 28. maja – lětosa južo 10. raz. A co jo cil takego dnja? Z tym dnjom kśě pokazaś na to, až kuždy góle dej něźi móc grajkaś. NOPŹ co ale teke na to pokazaś, až źiśi deje móc se na cełem měsće licho pógibowaś. Problem ga jo, až wšuźi jo městno za awta. Na drogach južo dawno njamógu źiśi wěcej grajkaś. Samo na chódnikach parkuju a jědu awta a motorske młogi raz! To njejo rědnje. Až źiśi deje jano na wobgranicowanych městnach graś, to se su dorosćone teke wumyslili. Wšak su grajkanišća rědne. Ale dajo jich dosć a blisko našych domow? To jo take pšašanje. Dalšne pšašanje jo, wjele nowych grajkanišćow nastanjo, gaž luźe twarje nowe domy w městach.