Lubin/Lübben. Pśedslědny kóńc tyźenja, wót pětka do njeźele, jo se wěcej ako 100 nosarjow drastwow z cełeje Nimskeje w Lubinje zmakało a su wó aktualnych nadawkach a problemach wobradowali. Pśi tom su ale teke wjele rědnego dožywili.
Južo pětk wjacor su w gósćeńcu „Burglehn“ wšykne pśibytne se kradu wjaselili, ako Lubiński wušy šołta Lars Kolan jo se k prědnemu razoju pokazał w serbskej muskecej drastwje, kótaruž jo jomu Sarah Gwiszcz (designerka a šlodarka z Lubnjowa) ekstra za taku góźbu wušyła. Wón jo tamne zmakanje pón w nimskej a serbskej rěcy wótwórił a jo samo zlubił, až co se swóju drastwu wótněnta pśecej k wósebnym góźbam woblekaś. Take wuznaśe k tomu serbskemu jo něco nowego za Lubin! Teke naša luba Marga Morgensternowa z Lubina ako stawna a gjarda nosarka drastwy jo wjelgin glucna była. Spiwarki Błośańskego žeńskecego chora Lubin, to se wě, we swójich pyšnych serbskich swěźeńskich drastwach, su pón jich pśězu pśedstajili a mócny pśiklask za to dostali.