ŹO, GA, CO? ZAPISK TERMINOW
Nižej nalicone terminy stoje teke w śišćanej wersiji Nowego Casnika wótśišćane.
Jolic měniśo, až znajośo wažny abo zajmny termin, kótaryž serbsku zjawnosć zajmujo,
a cośo jen našym cytarjam k wěsći daś, ga pósćelśo jen nam z e-mailom abo faksom
(glej menij „Redakcija“).
Terminy (18.04.24)
Chóśebuz/Cottbus
Błośańska narěc we fokusu literarnego salona
Wšykne zajmce su wałtoru, 23. apryla, zeger 18:00 pšosone do kafejownje Zelig (Droga Friedricha Eberta 21) na pśiducy literarny salon „Sowohl als auch“. Jen organizěrujo Stefanie Krawcojc z pódpěru Dolnoserbskeje biblioteki w Chóśebuzu. Tenraz buźo pód motom „Wu wa Heeme woarn“ pśisamem wótzabyta błośańska narěc we fokusu. Bernd Pittkunings pśinjaso basni a spiwy we tej narěcy sobu a Brigitte Königowa wulicowańka. Zastup jo dermo. Móžośo ten wjacor teke knigły kupiś.
Wustajeńca: 30 lět Spěchowańske towaristwo za serbsku rěc w cerkwi
Ku góźbje tśiźasćalětnego jubileja załoženja se wótmějo wustajeńca wó stawiznach Spěchowańskego towaristwa za serbsku rěc w cerkwi z. t. (STSRC), a wóna se wótwórijo stwórtk, 25. apryla 2024, zeger 18:00 w klubowni Serbskego doma w Chóśebuzu na Droze Augusta Bebela 82. Wingrichojc Peter a Anke wótwórjenje wustajeńce muzikaliski wobrubijotej. Wustajeńca buźo wiźeś až do 26. julija.
Žylow/Sielow
Krimijowy źiwadłowy kus„Smjerś pó štuckach“
Bazěrujuce na wulicowańku Marcusa Kóńcarja stej Alexander Marusch a Madleńka Šołćic źiwadłowy kus insceněrowałej. To móžośo dožywiś njeźelu, 21. apryla, zeger 17:00 w gósćeńcu na športnišću w Žylowje. Kus jo dolnoserbski, ale dajo simultany pśełožk. Kórtki dostanjośo pśi wjacornej kasy abo w Glodnyojc kwětkowem domje.
Myšyn/Müschen
„Wjasele do rejki“
Njeźelu, 21. apryla, zeger 15:00 pšose Myšynarje na rejowańsku źěłaŕnicku z Michaelom Apelom do Wejsnego doma. Tam móžośo stare nimske a serbske ludowe reje nawuknuś. Rejowański mejstaŕ pšosy pśijaznje wó mały obolus.
Móst/Heinersbrück
Pósejźenje Domowinskeje kupki
Pětk, 19. apryla, pšosy mósćańska Domowinska kupka zeger 19:00 do gmejnskego centruma na swóju pśiducu zgromaźinu. Temje buźotej mjazy drugim gromadny wulět a pśedstajenje swajźbaŕskego pśeśěga.
Hochoza/Drachhausen
Serbske wótpołdnjo
Sobotu, 20. apryla, pšosy Šula za serbsku rěc a kulturu do gósćeńca „Złoty plon“ na zgromadne serbske wótpołdnjo, a to wót zeger 14:00 do 16:00. Wustupiju źiśecy ansambel Dolnoserbskeje kulturneje akademije, Gerald Šejn a spiwaŕska kupka „Wólbernosće“ z Górneje Łužyce z pisanym repertoire serbskich a słowjańskich spiwow. Ze Zieloneje Góry pśiźo młoźinski rejowański ansambel wót pólskeje partnaŕskeje šule. Pśizjawjśo se pód cysłom 0355 79 28 29.
Błobošojce/ Bloischdorf
Wósebna wustajeńca „Wólejowe mólaŕstwo Moniki Vargoweje“
W muzejowej brožni Błobošojce wótwóriju njeźelu, 21. apryla, zeger 15:00 wósebnu wustajeńcu „Wólejowe mólaŕstwo“ wuměłcowki Moniki Vargoweje z Grodka. Zastup se zachopijo zeger 14:00 a płaśi 4,00 euro, za źiśi 1,00 euro.
Łaz/Lohsa
Cytanje „Ducy domoj. Unterwegs nach Hause“
W domje Zejlerja a Smolerja cyta fotograf Jürgen Maćij ze swójich knigłow „Ducy domoj. Unterwegs nach Hause. Fotografien 1972-2022“ a to pětk, 19. apryla, zeger 18:00. Spisowaśelka Měrana Cušcyna cyta basni a teksty. Dalšne informacije namakajośo na internetowem boce
www.zejler-smoler-haus-lohsa.de.
„Łužyca“ – serbski magacin
Sobotu, 20.04.2024, zeger 13:30 – 14:00, w rbb-telewiziji
(we interneśe pód www.rbb-online.de/luzyca)
Serbski magacin „Łužyca“ jo tenraz w srjejźnej Łužycy ducy. Slěpjańska serbšćina jo mócnje wobgrozona a rědka rěc. Něga su na jsach slěpjańskeje wósady powědali skóro jano serbski. Rěc njejsu pak pó 2. swětowej wójnje dalej dali młodej generaciji. Pśeśiwo tomu zapěra se rěcna motiwatorka Juliana Kaulfürstowa. Zgromadnje z rěcywědnikom Hincom Rychtarjom wuchowajo znankstwa slěpjańskeje rěcy a kultury. K městnam wobchowanja a wuchowanja słuša teke Šusterojc dwór we Slěpem. To historiske městno wuzgónjujo a pśedstaja moderator Christian Matthée. Wóttam wupórajo se magacin teke na wulět do Błotow. Na zachopku sezony buźo „Łužyca“ na Lědach a zaběra se z pšašanim, lěc eksistěrujo zboka wšuderkano pśibytnego turistiskego zwikowanja hyšći awtentiske serbske žywjenje póspóromje błośańskich tšugow. Wušej togo póglědnjo wusćełanje na prapremjeru błośańskego krimija „Smjerś pó štuckach“ we Hochozy, kótaryž pśedstajijo Nimsko-serbske ludowe źiwadło Budyšyn w dolnoserbskej rěcy. Wusćełanje jo jano w bramborskem rbb kanalu wiźeś!
Pórěźenje
W Nowem Casniku wót 4. apryla na 5. boce wó Dešnje smy pisali „... aby w pasiońskem casu jatšowne kjarliže zgłosyli.“ Pšawe jo ale, až w pasiońskem casu spiwaju „pasiońske kjarliže“. Zagronijomy se pla cytarjow.
