Z Pódstupima/Potsdam. Pó dłujkem casu jo se Rada za nastupnosći Serbow (RASW) zasej w prezency zejšła. Na 12. zjawnem pósejźenju RASW su na wětšy part wuraźowali wó dolnoserbskem rozgłosu a wó roli serbskich nastupnosćow w strategiji kraja Bramborskeje za digitalizaciju.

Cłonki rady su wjadli fachowe rozgrono z Davidom Biesingerom, nowym šefredaktorom sćelaka rbb, a z Angeliku Jordanoweju, wjednicu studija rbb w Chóśebuzu. Mjazy drugim su tematizěrowali ideju dolnoserbskego radijowego programa dopołdnja. Taku jo David Biesinger pak wótpokazał ako copaŕstwo, dokulaž górno- a dolnoserbski rozgłosowy program njeby dejałej koliděrowaś. Na drugem boce su zagronite rbb pokazali na nowo rozšyrjone digitalne póbitowanje dolnoserbskego rozgłosa, na pśikład z wětšeju mediateku a swójeju app.