Južo zachopjeńk januara jo serbske lipšćańske towaristwo Sorabija wózjawiło eksklusiwny trailer na youtube za swój tradicionelny studentski fašing. Pandemije dla jo se ten zasej – tak ako łoni – wótměł digitalnje, ako góźinu dłujki film pód titelom „Powěsće wo powědkach – bědźenja bajowych bytosćow“ (nimski: „Mythendrin – Sorben sagen Sagen“). Premjera jo była 12. februara wjacor na youtube, za tym až su studenty a studentki trjebali wjele tyźenjow za planowanje, pisanje a nawjerśenje togo fašingowego filma. Pśigótowanja su zachopili w nowembrje 2021 a w małych kupkach su wše cłonki Sorabije, jadnab 30 luźi, naźěłali ten projekt. Filmowanje, kótarež jo se wótměło w Lipsku, Budyšynje, Chrósćicach, Pančicach-Kukowje a w Radworju, stej nawjedowałej Michał Dónat a Matej Mark z pśedsedaŕstwa Sorabije.