Ze Serbskego domu/Wendisches Haus. Mimo Domowiny, serbskeje załožby a serbskich institucijow a šulow źěłaju w Dolnej Łužycy hyšći dalšne luźe kuždy źeń wjelgin pilne za to serbske. Su to mjazy drugim zagronite (Beauftragte) za serbske nastupnosći w měsće Chóśebuz a we tśich nimsko-serbskich wokrejsach SPN, OSL a LDS (wšykne styri su žeńske!). W Bramborskej jo tak rědowane, až jo to za nich głownoamtska funkcija, to groni, až su wóni pśistajone, zapłaśone wChóśebuskem měsćańskem abo we wokrejsnych zastojnstwach w Baršću, Złem Komorowje a Lubinje. Až maju wóni taki status, to jo wjelgin wužytne, to se na kuždy pad wupłaśijo.