Jubilej „750 lět Slěpe“ buźo sensacija, groni Diana Maticowa, regionalna powědaŕka a pśedsedaŕka Domowinskeje župy „Jakub Lorenc-Zalěski“ w rozgronje z Nowym Casnikom. Wóna jo była w zgromadnem źěle ze Slěpjańskeju gmejnu zagronita za pśigótowanje a organizaciju tamnych zarědowanjow. Jost Schmidtchen jo se z njeju rozgranjał.

Kněni Maticowa, jubilej stoj pśed źurjami. Programowe cedliki drje su južo rozdźělone we wšych domach a bydlenjach wósady kaž teke jsach a městach wokoliny. Nas zajmuju jadnotliwe zarědowanja. Nejpjerwjej raz to, nas wótcakujo tam na marku?

Mark buźo na wobyma dnjoma togo kóńca tyźenja. Něźi 50 wikowarjow, rucnikarjow a źěłarstwo wugbajucych jo swójo wobźělenje pśigroniło. Wóni budu se pśedstajiś na Droze měra mjazy Serbskim kulturnym centrumom a gmejnskim amtom. Tak buźo droga na wšych dnjach togo zarědowanja zatyknjona. Mjazy tamnymi luźimi budu – to se rozmějo – teke take, kótarež zastaraju woglědarjow z jězu a piśim.

Dwójc raz jo pśipowěźone teke zajtšne piwko. Kótare gerce budu tam graś?