Z Grodka/Spremberg. Teke w Grodku jo se kóńc tyźenja swěśiło, pó 3 lětach zasej raz domowniski swěźeń. Wjele programowych wjeraškow jo tam było za młodych a staršych luźi. Rozwjaseleński park jo wabił z wjelesymi atrakcijami až do ranych góźin. Na markowem jawišću stej publikum rozwjaseliłej Martin März a Vivien Gold. Chóśebuzaŕka jo nowa gwězda na šlagrowem jawišću, w Grodku stej wobej wuměłca prědny raz wustupiłej. Dobre rozwjaselenje su měli pśiglědarje teke z dujaŕskeju muziku drastwoweje kapały Grodk, z Wjelcańskimi dujaŕskimi gercami a dalšneju kupku dujaŕskich gercow. Luźe su byli wjasołe, zasej raz móc słuchaś pśi piwje na derje znate zuki. Wjele luźi jo tamkor pśichwatało. Za wikowarjow jo se połnje wupłaśił wóny swěźeń z 45.000 woglědarjami. Jo to był dosć měrny swěźeń. Wó njom jo groniła šołtowka Christine Herntier mjazy drugim: „Z tymi wjelesymi pśiglědarjami zacuwamy, až jo to pšawje taki domacny swěźeń pśewjasć a jich woglěd jo był źěk za tych samych, kótarež su se za to zasajźili, wšojadno lěc cesnoamtski abo głownoamtski.