Z Dešna/ Dissen. Pśigótowanja su zachopili w juliju, ako Domowinska młoźina jo se zmakała z Domowinskeju kupku. Ta jo se młoźinje póbitowała, se wó zastaranje staraś a jo se za to dojadnała z lodoweju kafejownju „Liska.“ Kupka jo pśigótowała rybjece guski a jo dopórucyła družyny piśow. Młoźinska šefowka a pśedsedaŕstwo młoźiny stej wobstarałej dj-a, kapału, gósćeńc a sportaŕski dom. Dwa tyźenja do łapanja kokota jo była młoźinska zgromaźina. How su pśišli k prědnemu razoju „te nowe“, ako lětosa worduju do młoźiny pśiwzete, a su se wšake detaile wó žnjownem swěźenju zjawili. Lětosa jo wjadła Elli Trebojc pśez zgromaźinu, dokulaž młoźinska šefowka Charlotte Kušcyc a młoźinske pśedsedaŕstwo wokoło Maksimiliana Hasackego a Christiana Quosojc maju prědk w blišem casu swóju funkciju na nowu generaciju dalej daś. Dwa tyźenja do žnjownego swěźenja su gólcy zwucowali rejtowaś. Teke lětosa stej zachopjeńkarja pódla byłej. Srjodu su se gólcy zmakali, aby pó zelene šli, a źeń pózdźej jo ceła młoźina wiła.