Z Brjazkow/Brieske. Na dwórje zmakanišća, w galeriji MARGA a na Wikach togo źěla Złego Komorowa su kazali wót prědnego do stwórtego septembra na źasety łužyski festiwal lyriki. Pśisamem 40 basnikaŕkow a basnikarjow, grafikaŕkow a grafikarjow, pěsnikaŕkow a pěsnikarjow jo pśichwatało do zagrodowego města Marga. Na planje su stojali muzikaliske programy za źiśi, mjazy drugim ze serbskim pěsnikarjom Berndom Pittkuningsom, śišćaŕska źěłaŕnja pód motom „Ako w casach Gutenberga“ a workshop „Poezija a kaligrafija“. Tam su woglědarje wuměłcam na palce glědali a se sami wuproběrowali. Sobotu su se pśedstajili awtorki a awtory, a muzikaŕki a muzikarje ze swójimi twóŕbami na jawišćoma na Wikach zagrodowego města Marga a na dwórje zmakanišća. Cytali su swóje twóŕby teke serbske basnikaŕki, a to w serbskej a nimskej rěcy. Źilka jo pśedstajiła baseń za źiśi a lyriku za dorosćonych, kótaraž wujźo znowa w Ludowem nakładnistwje Domowina we knigłach.