Z Dešna/Dissen. 17. oktobera jo ceła wjas była na nogach, pśeto su zasej wótcakali jury. Tenraz njejo jury była how dla wuběźowanja „Naša wjas ma pśichod“, ale dla „Europskego myta za wobnowjenje jsy“ pód motom „Mósty twariś“. Z tym mytom preměrujo se jsy, w kótarychž dajo pśikładne procese wuwiśa a wobnowjenja. Slědujuce myta su pśedwiźone: głowne myto a pón myta we złośe, slobrje a w bronzy. Dobyśa mytow njejsu pjenjeze, ale trofeje, pokale a wopisma.

Bytostny kriterium za wobźělenje stej skšuśenje gódnosći do pśichoda we wejsańskem rumje a pówušenje kwality žywjenja. Aby pokazało tej kompetency, jo se Dešno wobšyrny program za woglěd jury wumysliło. Wót zeger dweju jo jury ducy była z dešańskimi a zastupnikami a zastupnicami amta Bórkow, Domowiny, žarjabnice a wokrejsa Sprjewja-Nysa.