Grodk/Spremberg. Slědny tyźeń su pisali w Lausitzer Rundschau, až luźe w Grodku su rozgórjone, dokulaž w gaśeńskem jazorje jo wóda zasej taka bruna ako pjerwjej. Tenor jich wugronow jo był, až jo wšykno pódermo było. Ale LMBV, kótaraž wobgóspodarjujo załožk za cysćenje wódy, groni, až cysćenje tuchylu notne njejo. Južo wót wšogo zachopjeńka ga su tak planowali, až to cysćenje w lěśu njebuźo a za to maju teke dowólnosć. Južo 3. junija su toś z cysćenim wódy pśestali.

Slězyna jo, až w lěśu wóda pómałčej běžy, dokulaž jo wjele mjenjej dešća a dla togo njeběžy tak wjele wódy z teje zemje. Malsnosć jo w lěśu snaź 7 qm na sekundu, we zymjem 12 do 20 qm na sekundu. Dla pómałkego běžanja buźo zelezowy oksid se wót samego na dnu gaśeńskego jazora wótsajźiś, jo jich wótmyslenje. Tak jo to Casnikoju rozkładował Edelbert Jakubik z Myšyna, kótaryž jo jaden tych ekspertow za Zwězk cysta Sprjewa.