Chóśebuz/Cottbus. W chóśebuskej nowej radnicy jo se wótwóriła slědny tyźeń wustajeńca z fotografijami Gerd Ratteia. W nadawku Šule za dolnoserbsku rěc a kulturu jo wón w slědnych pěś lětach wjele ducy był w Dolnej Łužycy a pla serbskich luźi. Z togo jo nastała wustajeńca „Rückblicke und Ausblicke“, kótaruž su wótwórili pśi góźbje 24. jubileja Šule za dolnoserbsku rěc a kulturu. Až do kóńca awgusta jo tam 24 wjelikich barwojtych a 12 carno-běłych fotow wustajonych.

Wótmólowane su na pśikład impresije z Heincojc šlodarnje za serbske drastwy w Žylowje, wót pśěźenja na pśězy, rědnučke fota wót tych freskow w brjazyńskeje cerkwje, kótarež su gano renowěrowali (glědajśo na 4. bok) a wót wjele serbskich luźi. Wustajone su na pśikład fota Bertolda Pahna ze swójimi drjewjanymi grabjami na ramjenju, strjažojskego Fryca Krygarja a Žylowarja Erwina Mjerśeńca.