Z Janšojc/Jänschwalde. Wót oktobra wuźěła 21-lětny Janšowaŕ Noah Rex gódowny dar za swójogo pśijaśela. „Ja rad rozdarijom z ruku gótowane wěcy, z tym serbskim zwězane, dokulaž to jo wažne za nas“, groni Noah Rex. W interneśe jo se informěrował wó drebomje a fota klasiskego wjerśecego boma su inspiracije za njogo byli. „Som se wědobnje pśeśiwo klasiskemu drebomoju rozsuźił, ja som kśěł jen wjelgin wósobinski wugótowaś a pśez to jo moderna warianta nastała“, Noah Rex groni. Weto zapleśo tradicionelne elementy ako złośane wórjechy. Dalšne materiale, kótarež za wjerśecy bom wužyjo, su witki wórješka z gumna, lipane drjewo za baslenje, smuga swěśałkow, gódowne kulki ze serbskimi motiwami, transparentna papjera a mały motor za wjerśenje boma. Na tśich rowninach jo wón wšakorake motiwy wugótował: spódnu rowninu pyšnje wjelike sněgowe pjeluchy. Wesrjejź su dešańska cerkwja, bóśon, wašnja pisanja „Wjasołe gódy“, žeńska w serbskej drastwje na cołnje, powěsćowej figurje plon a wužowy kral a symbol twaŕca.