Z Janšojc/Jänschwalde. Domowinska kupka jo pšosył na „kulturnu woklapnicu“ a pó dwěma lětoma pawze su se wobydlarje walali do gósćeńca „K lipje“, aby woklapali zachadnej dwě lěśe. Pśed tym su se tšašnje wjele fotow wó 65 zarědowanjach a eventach wótedali a powědarje wšakich towaristwow su se akribiski pśigótowali, aby pśednoski wó jadnotliwych zarědowanjach źaržali. Pśedsedaŕka Domowinskeje kupki Rosi Tšukowa a gmejnski zastupnik Hein Dabo stej zgromadnje wuwitałej wobydlarjow a gósći Marcus Kóńcarja, jadnarja Domowiny, a Helmut Badtka, šołtu gmejny Janšojce. Pó spominańskej minuśe za we tom casu zemrětych, su se wótźaržali wuwitańsku rundu za nowo naroźonych zemskich wobydlarjow a nowych do jsy pśiśěgnjonych. Zwjaselece, až jo se źaseś źiśi naroźiło a 85 wósobow do Janšojc pśiśěgnuło. Zastupniki LEAG, kenž su teke dostali pśepšosenje za woklapnicu a dejali wó stawje wugloweje jamy Janšojce informěrowaś, su bóžko wótgronili. Hein Dabo jo k wěsći dał, až komunalne doglědowaństwo jo pśizwóliło groź na farskem dwórje nowo wukšyś. Chrom wužywaju tuchylu ako muzej.