Pódstupim/Potsdam. Wótpósłane w bramborskem parlamentu su stwórtk wjadli debatu wokoło krajnego plana k zmócnjenju serbskeje rěcy. Taki plan jo bramborske kněžarstwo dejało wuźěłaś na pśikaz parlamenta, źož su łoni w juliju take wobzamknuli.
Prědny raz ma stakim Bramborska plan, kak móžo kraj – pśisłušne ministarstwa a zastojnstwa – serbsku rěc aktiwnje pódpěraś a we zjawnosći nałožowaś. Ministarka za wědomnosć, kulturu a slěźenje Martina Münchowa (SPD) jo nalicyła głowne póla, na kótarychž ta pódpěra dej se wótněnta staś: 1. wuwijanje konceptow za rěcnu politiku; 2. informěrowanje wobydlarjow, co serbska rěc jo a kake rěcne pšawa powědarje serbskeje rěcy maju; 3. nagranjanje a wuskoboźenje wobydlarjow we nałožowanju serbskeje rěcy, pśeto serbska rěc njedej se jano we priwatnem, kšajźu a we zatajenju powědaś, ale we zjawnosći. 4. pisne a wustne wužywanje serbskeje rěcy pśez zastojnstwa dej se rozšyriś; 5. na pólu wuknjenja serbskeje rěcy a na pólu wědomnosći. Nagromadu su to 50 konkretnych napšawow (Maßnahmen), kótarež su do krajnego plana zapisane.