Z Baršća/Bórkow/Forst/Burg. List bórkojskich ceptarjow jo wubuźił reakcije politikarjow a amtarjow, Krajny raźc we wokrejsu Sprjewja-Nysa Harald Altekrüger (CDU) jo wuzwignuł, až su demokratiske gódnoty za njogo wjelgin wažne. Wokrejs zasuźijo rasistiske, homofobne a pšawicaŕske myslenje a zawěsćijo tej šuli swóju pódpěru, aby se rozestajali z problematiku, a groni, až stoj we wuskem kontakśe ze šulskim amtom w Chóśebuzu. Južo něnto financěrujo wokrejs šulske socialne źěło w Bórkowach. Šula dej byś městno, źož wukniki a ceptarje se cuju wěste, tam njejo městno za ekstremizm a namóc.