Z Turjeja/Tauer. 30. maja jo turjańska młoźina swój majski bom pśi wognjowej woborje z ruku stajiła. Wjele wobydlarjow jo pśišło, aby se woglědało rědnje wupyšnjony majski bom. Mimo pśišeł jo ga sćelak rbb z teamom magacina Łužyca, aby swětosny spektakel filmował. Łužyca-moderator Christian Matthée jo sebje ga za młode žeńske z tamnjejšeje młoźiny rad za fota k dispoziciji stajił.
W swójom procowanju za wuběźowanje jo młoźina kuždy źěłowy kšac dokradnje wopisała. Kak su wóni na pśikład girlandu a wěnc wuwili abo su strusacki wótrězali. Samo młode kjarle su pśi tom pomagali.
Mjaztym až muske su stajili 19 mejtari wusoki majski bom, su młode žeńske z Turjeja swóje drastwine pókłady pokazali. Mimo girlandy a wěnca su majski bom pyšnili ze serbskeju fonu a z bantami w serbskich barwach. Ako kulturny ramikowy program jo drastwina rejowańska kupka z Barbuka tradiciske reje pokazała.