Z Kózlego/Casel. Źeń Swětego Jana (24.06.) źo slědk na Jana, togo dupjarja w Bibliji, kenž jo był pśedchadnik a drogupśigótowaŕ Jezusa Kristusa. Jan jo kritizěrował druge manźelstwo Herodesa Antipasa, kněžarja w tegdejšej Galilejskej. Togodla jo dał ten na kšajźne žycenje swójeje drugeje žeńskeje pśikaz, aby Janoju głowu wótrubnuli. W lěśe 1843 wobspomnjejo zběraŕ ludowych spiwanjow a etnograf Jan Arnošt Smoler (1816 - 1884) nałog Jańskego rejtowanja w Malinju, což jo źinsa měsćański źěl Drjowka a tež, až su měli za Serbow zela, tergane na dnju Swětego Jana, a zrownju kwiśonki paprośi namakane na tom dnju, wósebne gójaŕske mócy. Jańske rejtowanje jo se pśewjadło teke za DDR-ski cas, ako mjazy drugim wobwěsćijo listowa znamka z lěta 1982.