Z Wjerbna/Werben. Slědnu sobotu su Wjerbanarje se zmakali na športnišću, aby balokopaŕskim mustwam ze swójeje drogi pśi turněrje pśi góźbje športowego swěźenja palce tłocyli – abo sam sobu grali. Njejo se kuždej droze raźiło swójske mustwo na nogi stajaś. A tak su se mimo tśich mustwow z wšakich wjerbańskich drogow (Słyńckowa droga, Bórkojska šoseja, Grodowy park) teke młoźinske mustwo (kenž jo moderator ako „Droga młoźiny“ pśipowěźeł), ga dwě mustwje z wejsańskego źěla Rubyn a pó dłujkem casu zasej žeńskece mustwo (Spieler-Muttis/Mädels) wobźělili na tom wejsnem sportowem swěźenju. Teke naša redakciska asistentka Anna Günikerowa pśed krotkim pilnje sobu treněrujo pla mamow młodšych balokoparjow.