Z Błotow/Spreewald. Pěś dnjow dłujko jo warnowała padlowańska tura za młodostnych, ako jo Domowina pśewjadła wót zachadnego pónjeźelego do pětka. Ten pilotowy projekt jo Franciska Albertowa, zagronita dolnoserbskeje župy za serbske młoźinske źěło, organizěrowała w kooperaciji z chóśebuskim Rěcnym centrumom WITAJ.

Łoni, na kóńcu tradicionelnego WITAJ-campa w Jarješku, stej wóna a Maks Bagańc, sobuźěłaśeŕ centruma, se rozgranjałej ze staršymi wobźělnikami. Wónym młodostnym, ako su zwětšego w sekundarnem schójźeńku Dolnoserbskego gymnaziuma, jo se kśěło raz hynakše młoźinske zgromaźeństwo dožywiś. Głowny zmysł jo dejał byś, twóriś rum za serbsku rěc pśi aktiwitach w pśiroźe, toś su se rozsuźili za padlowański wulět pó Błotach.