Ze Strobic/Ströbitz. Ku kóńcoju lěśa su temperatury zasej mócnje pśiběrali, wót togo pak strobicańska młoźina njejo se dało móliś. Dypkownje zeger 13:30, zachadnu sobotu, su se styrjo rejtarje na Jerolojc kónjach, 14 źowćow w rejowańskej drastwje a kapała „Ströbitzer Musikanten“ wudali wót Šejcojc dwóra, aby w pórědnem śěgu do Šultkojc sćernišća maršěrowali a kokot swěśili. Na gluku jo se tam wšo derje pśigótowało a woglědarje a wobźělniki su se mógali nad stanami pśed słyńcom schowaś abo se wochłoźiś ze chłodnymi piśami.